"CinemaPlus Gənclik Mall"-da Xalq artisti Faiq Ağayevin ifa etdiyi, musiqisi Nadir Nəğd Pula, sözləri Cavid Şahbazbəyova aid olan "Gözüm dəyməsin sənə" mahnısına hazırlanan klipin təqdimatı keçirilib.

Magazinews.Az az xəbər verir ki, çəkiliş müddəti ümumilikdə 29 saata, klipin hazırlanması isə bir aya başa gələn klipin rejissorluğu Nail Naiboğluya həvalə olunub. Xatırladaq ki, bu xalq artisti ilə rejissorun birlikdə ərsəyə gətirdikləri ilk ekran işidir.

6 il fasilədən sonra çəkilən klipin yaradıcı heyətinə gəlincə isə ssenari müəllifi Aleks Anişenko, operator Delee, montajçı Əhməd Əli, rəng korreksiyası Emin Muradov, səs rejissoru isə Teymur Abdullayevdir. Stilistlər "İn Studio"-dan Nuranə, Zeynəb və Roman Məmmədovdur. Klipin prodüsseri Faiq Ağayevdir.

Ekran işində əsas obrazı yazıçı Nərminə Məmmədzadə canlandırıb. Bundan əlavə, digər rollarda bir çox məşhur simalar - Xalq artisti Murad Dadaşov, Əməkdar artistlər Rafael İsgəndərov, Coşqun Rəhimov, Tünzalə Əliyeva, Sona Babayeva, Mirzə Ağabəyli, Nadir Nəğd Pul, Ramil Nabran, rəqqasə Fatimə və oğlu Hüseyn, stilist Roman Məmmədov, aktrisa Mənsurə Əliyeva və Şahin Hüseynovun rəhbərlik etdiyi "Grifon" rəqs qrupu çəkiliblər. Çəkilişlər "Baku Bizness Factory" ofisində, bir qismi isə "Ağ Şəhər" -də həyata keçirilib.