Əsas / Son xəbərlər / İdman

"Qalatasaray"ın ulduzuna yumruqlu HÜCUM - Anbaan VİDEO

Lukas Torreyraya İstanbulun Beyoğlu rayonunda yumruqla hücuma məruz qalıb.

Citynews.Az-ın Türkiyə mediasına istinadən məlumatına görə, hadisə Camiikebir məhəlləsində yerləşən bir ticarət mərkəzinin qarşısında, kafedən çıxış zamanı baş verib.

Məlumata görə, "Qalatasaray"ın ulduzu Torreyra sevgilisi ilə birlikdə məkanın qarşısında olarkən, əvvəllər uzaqlaşdırma qərarı olduğu bildirilən Y.Y. adlı şəxs ilə qarşılaşıb. Tərəflər arasında qısa sözlü mübahisə yaranıb və daha sonra vəziyyət gərginləşib.

İddialara əsasən, Y.Y. futbolçuya yumruq zərbəsi endirib. Hadisədən sonra ətrafdakı şəxslər müdaxilə edib, şübhəli isə taksi ilə ərazidən uzaqlaşmağa çalışsa da, təhlükəsizlik əməkdaşları tərəfindən saxlanılaraq polisə təhvil verilib.

Polis araşdırması zamanı həmin şəxsin əvvəlki "qəsdən xəsarət yetirmə" cinayəti üzrə qeydinin olduğu, həmçinin barəsində uzaqlaşdırma qərarı mövcud olduğu müəyyən edilib.

Hadisə zamanı Lukas yüngül xəsarət alıb. Onun sol göz və qaş nahiyəsində qızartı olduğu bildirilib və futbolçu tibbi müayinədən keçirilib.

Zərərçəkən futbolçu ifadəsində hücumu gözlənilməz adlandıraraq, həmin şəxsi tanımadığını və ona qarşı heç bir fiziki hərəkət etmədiyini bildirib. O, baş ağrısından şikayətlənərək hüquqi şikayətçi olduğunu da qeyd edib.

İş üzrə saxlanılan şübhəli məhkəməyə göndərilib və araşdırma davam edir.

Hüseyn