Əsas / İdman

23 yaşında rekordlar qıran Mbappe “Qızıl buts” mükafatı aldı

Xəbər verdiyimiz kimi, dünya çempionatının finalında Argentina Fransanı penaltilər seriyasında məğlub edib.

Həlledici oyunda 3 qol vuran fransızların hücumçusu Kilian Mbappe isə mundialın bombardiri olub.

O, 8 qolla “Qızıl buts” mükafatına layiq görülüb.

Dünya çempionatının finalında Argentinaya uduzan fransızların futbolçusu Kilian Mbappe bir neçə rekord sahibi oldu. “Qafqazinfo” xəbər verir ki, hələ 23 yaşında olan ulduz forvard mundialların həlledici oyununda het-trik edən ikinci futbolçu kimi tarixə düşdü. 

İndiyə qədər bu rekordun tək sahibi İngiltərə yığmasının sabiq futbolçusu Ceff Herst idi. O, 1966-cı il mundialının finalında Almaniya ilə matçda 3 qol vura bilmişdi. 

Mbappenin digər rekordu isə finallarda 4 qol vurması ilə bağlıdır. İndiyə qədər iki finala çıxan 23 yaşlı oyunçu 4 dəfə rəqib qapılarına yol tapıb. O, 2018-ci il Rusiyada keçirilən mundialın həlledici oyununda Xorvatiyanın qapısına qol vurmağı bacarmışdı. 

Ötən günü daha 3 dəfə fərqlənən Mbappe bu göstəricidə finallarda 3 qol vuran Ceff Herst, Vava, Pele və Zidanı geridə qoydu. 

Kilian, həmçinin dünya çempionatları tarixində 12-ci qolunu da vurub. O, bununla Qabriel Batistuta, Qari Linekeri, Yurgen Klinsman kimi əfsanələri geridə qoyub. Qarşıda ən azı 3 dünya çempionatında oynayacağını nəzərə alsaq, Mbappenin bütün rekordları qıracağı gözləniləndir. 

23 yaşlı superulduz artıq bir çox göstəricilərdə tək rekord sahibidir.