Əsas / Dünya

Çavuşoğlu: “Öhdəliklərini yerinə yetirdiklərini görmədən İsveçin NATO üzvlüyünə “hə” deməyəcəyik”

“İsveç-Finlandiyanın NATO-ya üzvlüklə bağlı öhdəlikləri var. Bu addımları görmədən İsveçin NATO üzvlüyünə “hə” deməyimiz mümkün deyil”.

Bu barədə Türkiyənin xarici işlər naziri Mövlud Çavuşoğlu, Macarıstanın Xarici İşlər və Xarici Ticarət naziri Peter Siyarto ilə birgə mətbuat konfransında bəyan edib.

O bildirib ki, İsveç tərəfi terrorizmin təzahürlərinə qarşı mübarizə ilə bağlı Ankaranın narahatlığını nəzərə almalıdır. 

Çavuşoğlu Ankaranın NATO-nun Madriddə keçirilən sonuncu sammiti çərçivəsində iki Skandinaviya ölkəsi ilə müvafiq üçtərəfli memorandum imzaladığını xatırladıb və qeyd edib ki, İsveç hakimiyyəti krallığın qanunvericiliyinə düzəlişlər etsə də, terrorçuların əlaltıları bu ölkədə sərbəst fəaliyyətlərini davam etdiriblər.

“İki Skandinaviya ölkəsinin NATO-ya müraciətlərinə ayrıca baxa bilərik. Ankaranın Finlandiyanın müraciətinə münasibəti daha müsbətdir”, - deyə türkiyəli nazir bildirib.

Türkiyə XİN rəhbəri həmçinin Avropa ölkələrində anti-İslam hərəkətlərinə sanksiya verilməsini qəti şəkildə pisləyib.

“Bu cür cinayətlər dini nifrətin təzahürüdür. Dinindən asılı olmayaraq müqəddəs kitabların təhqir edilməsi küfrdür və qəbuledilməzdir. Dünya ictimaiyyəti bu cür cinayətlərə qarşı birgə mübarizə aparmalıdır”, - deyə türkiyəli nazir vurğulayıb.

Mənbə: “Anadolu” Agentliyi