Son xəbərlər / İdman

“Lüdoqorets”in baş məşqçisi: “Qarabağ”la matçda səhvlər buraxmaq olmaz”

“Futbolçularım çox gərgin idi. Bu da fərdi səhvlərə səbəb oldu”.

İdman.biz xəbər verir ki, bunu “Qarabağ”ın Çempionlar Liqasının III təsnifat mərhələsində rəqibi olan Bolqarıstanın “Lüdoqorets” klubunun baş məşqçisi Qeorqi Dermendjiev deyib.

O, komandasının II təsnifat mərhələsinin səfər oyununda Minsk “Dinamo”suna 0:1 məğlubiyyətini şərh edib. Təcrübəli mütəxəssis bildirib ki, ilk görüşdə qazanılan 2:0 hesablı qələbə köməklərinə çatıb.

Dermendjievin sözlərinə görə, artıq irəli baxmaq lazımdır və “Dinamo” ilə oyundakı səhvləri “Qarabağ”la dueldə buraxmaq olmaz: “Növbəti mərhələdə daha sərbəst mübarizə aparacağıq. Mümkün qədər irəli getmək istəyirik. “Qarabağ” kimi komandaya qarşı matçlarda “Dinamo” ilə oyunlardakı kimi səhvlər buraxmaq olmaz. Yaxşı oynamaq üçün özümüzə inam vacibdir. Məncə, artıq oyunçularımız bir qədər rahatlana bilərlər. Çünki növbəti mərhələyə yüksəlmişik. Gələn dəfə həm səfərdə, həm də evdə sakit oyun keçirməliyik”.

Qeyd edək ki, “Qarabağ” avqustun 6-da “Lüdoqorets”i qəbul edəcək. Cavab qarşılaşması 1 həftə sonra Bolqarıstanda keçiriləcək.