Əsas / Mədəniyyət / Kino

DokuBaku Festivalı 6-cı buraxılışın proqramını açıqlayıb

DokuBaku BSFF festivalda nümayiş olunacaq filmlərin seçimini yekunlaşdırmışdır.

CityNews.Az xəbər verir ki, 32 müxtəlif ölkədən 68 sənədli film seçilmişdir. Bütün filmlər 7 kateqoriya üzrə nümayiş olunacaq. Ən Yaxşı Sənədli Film (13), No-Main Müsabiqəsi (18) və Ən Yaxşı Xarici və Yerli Qısa Sənədli Film (19) kateqoriyasındakı filmlər münsiflər heyyəti tərəfindən dəyərləndiriləcək və qaliblər festivalın sonuncu günü, Sentyabrın 25-i elan olunacaqlar. Qalan filmlər isə Müsabiqədən Kənar (5), DokuKids (4), və DokuUA (5) kateqoriyalarında nümayiş ediləcəklər.

Hər il festivalımız öz işləri ilə film sənayesində yüksək standartlar qoymuş, dünyaca məşhur bir sənədli film ustasının filmlərindən ibarət silsilə nümayiş təşkil edir. Bu il öz “Tülpan” tammetrajlı filmi ilə 2009-cu il Oskar mükafatlarının Əcnəbi Film Kateqoriyasında Qazaxıstanı təmsil etmiş xüsusi qonağımız Sergey Dvortsevoyun dörd filmindən ibarət retrospektiv hazırlamışıq.

Festivalın 6-cı buraxılışı iki yeni kateqoriya ilə gəlir. Festival tarixində ilk dəfə proqrama Uşaqlar üçün Sənədli Filmlər daxil edilmişdir. Eyni zamanda, festival Ukraynadan sənədli filmlər nümayiş etdirməklə, Ukraynalı rejissorlara dəstək olacaq. Nümayişlərin məkanları, tarixləri, və vaxtlarından ibarət cədvəl önümüzdəki həftələrdə açıqlanacaq.