“CinemaPlus”da “Həyat, deyəsən, gözəldir” filminin Qala gecəsi anşlaqla keçirildi

| 29-09 08:35 |

“Gənclik Mall” ticarət mərkəzində yerləşən “CinemaPlus” premium kinoteatrında Xalq artisti Vaqif Mustafayevin “Həyat, deyəsən, gözəldir” filminin Qala gecəsi anşlaqla keçirilib.

Zal son yerə qədər tamamilə dolu idi. Qonaqlar arasında şou-biznes ulduzları, jurnalistlər, blogerlər, İkinci Qarabağ müharibəsi veteranları və fəxri qonaqlar olub.

Film Mədəniyyət Nazirliyinin sifarişi ilə “Azərbaycanfilm” kinostudiyası tərəfindən istehsal olunub.

Beynəlxalq premyera 4 noyabr 2022-ci ildə “Qorqud Ata” Türk Dünyası Film Festivalında baş tutub və əsərin rejissoru, ssenari müəllifi Vaqif Mustafayev “Türk dünyasının ən yaxşı rejissoru” nominasiyası üzrə mükafatlandırılıb.

Baş rollarda: Hikmət Rəhimov, Nino Qomarteli, Dmitri Samxaradze, Giorgi Çeliya, Aftandil Maxaradze, Sevinc Əliyeva, Anaida Rostovskaya və başqaları.

Film erməni daşnaklarının 30 ilə yaxın bir müddətdə zəbt edərək talayıb viran qoyduğu Qarabağ torpaqları uğrunda gedən 44 günlük Vətən müharibəsindəki Zəfərimizdən bəhs edir. Azərbaycan Ordusunun hücumları nəticəsində ermənilər aciz qalır, təlaşa düşürlər. Əsir alınan erməni əsgərləri arasında iki qardaş da var. Qardaşların sonrakı aqibəti tragikomik janrda olan ekran əsərinin əsasını təşkil edir.

Çəkilişlər Xocavənd rayonunun Hadrut kəndində, Xızı rayonunda, Bakı və Abşeron yarımadasında aparılıb.

Tədbirin təşkilində foto və video "Light in Black" kreativ şirkəti və “Merry Band” peşəkar musiqi qrupu dəstək göstəriblər.

Qeyd edək ki, film sentyabrın 28-dən etibarən bütün "CinemaPlus" kinoteatrlar şəbəkəsində nümayiş olunur.

[media=]